O‘zbekiston arxitektura qurilish kollejlari talabalari KNAUF komplekt tizimlari asosidagi quruq qurilish bo‘yicha 5-hududiy kasb mahorati tanlovida qatnashdilar.
O‘zbekistondagi KNAUF kompaniyasi va O‘rta maxsus kasb-hunar ta’limi markazi tomonidan beshinchi bor tashkil etilgan quruq qurilish bo‘yicha kasb mahorati tanlovi 2018-yil 27-aprelda bo‘lib o‘tdi. Bu gal tanlov ishtirokchilari bo‘lgan O‘zbekiston qurilish kollejlari talabalariga Toshkent arxitektura qurilish kolleji mezbonlik qildi.
Tadbir o‘tkazilishi an’anaga aylanib ulgurdi va bu an’ana yildan-yilga o‘zgacha tus olib bormoqda. Har bir tanlov kasbni o‘zlashtirishdagi muvaffaqiyatlarni namoyish etish, amalda qo‘l keluvchi metodologik uslublar almashinuvi maydoniga aylanmoqda. Ishchi kasblarni ommaviylashtirish va mutaxassislarning kasbiy tayyorgarlik darajasini oshirishga ko‘maklashish tanlovning muhim maqsadi sanaladi. Bu galgi, beshinchi tanlov ta’lim dasturi rejali asosda amalga oshirilayotganidan dalolat beradi va talabalarning tayyorgarlik darajasi yuqori ekanligini ko‘rsatdi.
“KNAUF GIPS” MCHJ Rossiya bo‘linmasi markaziy ta’lim bo‘limi rahbari Parikova Ye.V. qatnashchilarni iliq so‘zlar bilan tabrikladi. Hay’at a’zolari barcha qatnashchilarga nisbatan xayrixohlik ko‘rsatdilar, tanlovning o‘zi amaliy, lekin do‘stona muhitda o‘tdi. “Yildan-yilga KNAUF tanlovlariga qiziqish o‘sib bormoqda. O‘quvchilarning tayyorgarlik darajasi sezilarli o‘sganligini, ularning o‘z mahoratlarini namoyish etishga astoydil intilishlarini va jamoaviy ishlashga qiziqishlarini ko‘ryapmiz. Umumiy sa’y-harakatlar va qurilish sohasidagi yosh mutaxassislarni to‘g‘ri rag‘batlantirish orqali biz yaqin kelajakda yuksak natijalarga erisha olamiz”,- deya o‘z fikrlari bilan o‘rtoqlashdi KNAUF Axborot-maslahat markazi rahbari Sanjar Atoyev.
Tanlov ikki bosqichda o‘tkazildi. Birinchi bosqichda o‘rta maxsus kasb-hunar o‘quv muassasalari talabalarining nazariy bilimlari tekshirildi. Qo‘yilgan savollarga aniq va to‘g‘ri javob berilishiga alohida e’tibor qaratildi. Ikkinchi bosqichda, bevosita musobaqalarda ikki ishtirokchidan iborat jamoalar yuqori darajada nazariy va amaliy tayyorgarlikni, kasbiy mahorat, mehnat madaniyati, professional atamashunoslikdan boxabarlik, zamonaviy qurilish texnologiyalarini amaliyotda qo‘llay bilish, jumladan asboblar va materiallardan foydalanish ko‘nikmalarini va ishni to‘g‘ri tashkil qila olishlarini ko‘rsatishlari kerak bo‘ldi. Hay’at a’zolari topshiriqlarni bajarish sifatini kuzatib bordilar.
Ikki bosqich yakunlariga ko‘ra natijalar e’lon qilindi va g‘oliblarni taqdirlash marosimi o‘tkazildi. Toshkent arxitektura qurilish kolleji jamoasi 3-o‘rinni egalladi, 2-o‘rin Jondor qurilish va milliy hunarmandchilik kasb-hunar kolleji (Buxoro viloyati)ga nasib etdi. Sovrindorlar qimmatbaho va yodgorlik sovg‘alari bilan taqdirlandilar. Birinchi o‘ringa Marg‘ilon qurilish kolleji munosib topildi. G‘olib keyingi yil Ukrainada o‘tkaziladigan mahorat tanlovida qatnashadigan bo‘ldi.
Qurilish kollejlari talabalari o‘rtasidagi kasbiy mahorat tanlovlari mehnat musobaqalarining eng ta’sirchan shakli bo‘lib, ilg‘or mehnat hamda progressiv texnologiyalarning usullari va uslublarining tarqalishi va tatbiq etilishi, kasbiy tayyorgarlik sifatining ortishi, shaxs va uning ijodiy salohiyati kamoloti, tanlov ishtirokchilarining eng yaxshi individual natijalarini aniqlash, shuningdek ishchi kasblarini ommaviylashtirishga xizmat qiladi.
